Importazione di latte é casgii corsiIntroitu
Incu a redazione é a difusione di ‘ssu documentu, Via Campagnola a cunsideratu l’ubligatoria necessità di fà cunnosce à tutti, l’inseme di l’elementi chi permetteranu di capisce di manera obbiettiva a situazione di a filiera lattaghja in Corsica.
Issa dimarchja d’infurmazione é di riflessione a per scopu d’almanaccà e cundizione serene d’un dibbatitu nantu à i nostri casgii corsi.
E pratiche d’introduzzione di materie agricule destinate ad esse transfurmate in produtti corsi, cume l’etichettatura in Corsica di produtti d’importazione digià trasfurmati in altrò, anu aspessu scuzzulatu a prufessione agricula.
Oghje i capi di e piccule imprese corse di a trasfurmazione lattaghja anu decisu di fà entre latte di l’Aveyron o di Sardegna per a produzzione di furmagli corsi. Certi pastori opposti à pratiche simile, chjamanu à un veru dibbatitu annantu ciò ch’elli sò i furmagli corsi.
A produzzione pecurina é capruna corsa
A pecura corsa (circa più di 100 000 bestie) ghjé, secondu un studiu di u C.N.B.L. (Comité National Brebis Laitière), à pesu equipollente, quella chi a u putenziale u più imprtante di produzione lattaghja. Ghjé a pecura chi valoriseghja u megliu l’erba. A razza corsa hé ricunnisciuta uffizzialamente.
Una struttura, l’ UPRA (Union des Producteurs pour la promotion de la Race Animale) Pecura Corsa a in carica a maestria di u so schema di selezzione.
Una Cooperativa regionale di pastori, CORSIA (COoperativa Regionale di Selezzione et d’Inseminazione Artificiale), s’impegna di a difusione di u prugressu geneticu é prupone parechji servizii à i so cooperatori, mà vende dinù à tutti i pecuraghji corsi chi ne facenu a dumanda, animali selezzionati.
A capra corsa (solu più che 30 000 bestie) razza dinù ricunnisciuta, ghjé in periculu! Sò poche e capre corse é infastidite dà malatie é prublemi sanitarii imbrugliati.
A razza corsa a bisognu oghje, d’un veru pianu tecnicu é economicu di salvezza.
Ghjé l'animale chi valoriseghja u megliu a risorsa nutritiva machjaghjola. Resiste cume nunda altru animale à i scarti eccessivi di u clima isulanu cume di i so reghjoni muntagnoli.
I respunsevuli di e piccule imprese di trasformazione lattaghja (sole duie sò d’importanza) raprisentanu in Corsica più d’una quindecina d’unità chi impieganu menu di 200 operai (ETP (Equipollente Tempu Pienu à l’annata)). A maiore parte di queste l’unità, so piazzate longu à piaghja orientale trà Lucciana é Ghisunnaccia, duie sò stallate inde u circondu Aiaccinu é una inde u Rustinu.
L’ultima é unica struttura cooperativa ghjé ella, situata inde l’Altu Taravu. E duie imprese e più importante caghjanu à elle duie, 60% di u latte compru à i pastori corsi é impieganu più d’un terzu di iss’operai.
A produzzione tutale di casgiu corsu hé di circa 1 800 tonnelate à l’annu per à pocu pressu 8.5 millioni di litri di latte caghjatu dà l’impresarii.
I pastori (pecuraghji é capraghji), più di 700 sò belli scumpertuti in tutte e pieve di Corsica. I pastori, mariti é moglie quand’elli travaglianu inseme incu i so operai quande ellu ci n’hé, raprisentanu 1 200 ETP à l’annata. A produzzione totale di latte in Corsica ghjé di 15 Millione di litri, 8.5 venduti à i lattaghji é 6.5 Millioni direttamente caghjati in casa dà i pastori, per una fabricazione di 1 200 tonnellate di casgiu casanu à l’annu.
U cifru d’affare realizatu dà a vendita di casgiu corsu trapassa i 60 millioni d’Euri é più di 30% di i furmagli corsi so venduti fora di Corsica.
Tutti ‘ssi produtti sò bramati, ricercati, anu rinomina é fama per ste Francie é aldilà, eppuru a filiera oghje s’impetta à dificultà maiò:
In dece anni di tempu, sò calati i pecuraghji di 25% é i capraghji, elli di 40%!
In media, sò piuttostu d’étà avanzata i pastori, 30% anu più di 50 anni é sò poche é micca e riprese ò e stallazione di giovanni. Una per cinque partenza à a ritirata.
A debbulezza di i rivenuti ne hé a causa principale, l’impurtanza di l’investimenti necessarii é a dificultà purtata dà l’obligu di presenza per a munghjera duie volte à ghjornu sò d’altri fattori di disanimentu.
Ci vole quì, à mintuvà che a munghjera, ella sola, custringhje à una presenza quotidiana mane é sera durante circa 250 ghjorni à l’annu.
U rivenutu di i pastori corsi chi vendenu u so latte hé inferiore di 35% à u rivenutu naziunale francese di e listesse categorie (menu d’un SMIC annuale). Si pò pensà ch’ellu hé u risultatu di i costi di produzzione più alti nantu à l’isula che in cuntinente (alimentazione di u bestiame, trasporti, fuel...) mà dinù di una produttività debbulissima di e bande in generale cume di u differenziale d’aiuti tochi dà i pastori. Questu ghjé assai superiore in Francia cuntinentale.
In Corsica soli 18% di i pastori sò seguitati dà i servizii technichi, di pettu à 80% in Francia é 95% in Sardegna. Ghjé impurtantissimu di sapèla perché spiega in corte parulle u perché di l’assenza di prugressione di produttività per pecura dapoi trent’anni in Corsica, à cuntrariu di ciò chi s’hé vistu in d’altre cuntrate lattaghje auropeane.
Soli i pastori impegnati inde u schema di selezzione (UPRA), anu riesciutu à cresce assai u so nivellu di produzzione. Di più, a maiore parte di i pastori soffrenu d’ùn pudè ammaestrà u fundariu indispensevule à e so strutture, mà dinù d’un avè l’arnesi é u materiale utuli à custruisce un’indiatura tecnica cunseguente.
U capatoghju di a mubilisazione di u fundariu per i nostri sistemi estensivi di produzzione, ferma d’attualità. L’allevu lattaghju entre in concurenza incu a speculazione fundaria in piaghja, à vede dinù inde u circondu di certi paisoni muntagnoli.
Vene difficiule per i pastori di luttà senza u sustegnu puliticu di a Culletività Territoriale di Corsica ne quellu di l’urganisimi in carica di a regulazione di i mercati fundarii agriculi. A concurenza vene dinù, aspessu d’altre attività agricule più attrative é sopratuttu di a filiera vaccina, chi dumanda poche custrizzione in qualità di presenza fisica, mà chi ghjé assai più sustenuta à u nivellu regiunale per a percezzione di l’aiuti publichi (e prime).
I produtti é a so cummercialisazione
I casgii corsi, tramandeghjanu ad elli soli una parte maiò di a cultura corsa.
Raprisentanu, viva una agricultura campagnola é famigliale esciuta dà i tempi i più landani incù sistemi di produzzione pastoralisti ammaestrati é identidarii.
A particularità di’ssi furmagli hé fundata nantu à so varietà é a so diversità: l’aspettu, i gusti, e forme, i culori, e strutture. Eppuru sò tutti furmagli caghjati à latte crudu!
U latte muntu in Corsica hé sempre un latte fattu d’erba à u pasculu. U pasculu ghjé a basa di l’alimentazione di i nostri animali. Ghjé pocu u mansume é solu custituitu di biade, fenu o cibu dissecatu. U latte crudu é frescu sprime duncque tutte e so qualità specifiche chi venenu dà una alimentazione naturale cambiarina segondu i reghjoni é e stagione.
A contrariu in certe cuntrate francese, taliane oppuru in Sardegna, i sistemi di produzzione sò assai più intensificati. U mansume é a pruvenda per l’animali venenu elli, dà tecniche di raccolta é di cundizionamente d’erba croscia o d’alimentazione custituita di pruteine ricustituite o puru ancu animalesche. L’allevu si face chjosu inde i barracconi, é so schersi l’animali chi vedenu u sole é si godenu l’ aria fresca tutti i ghjorni.
A cummercialisazione di i furmagli corsi hé in crescita. Si face tutta o guasi, incu una pulitica di marca. Ogni produttore (impresariu o pastore) sceglie di valorizà à so propria marca. Quella porta aspessu u nome sia di a latteria, sia a casata di u produttore, é de volte ancu u nome di u locu di produzzione.
A scrittura «furmagliu corsu» hé rarissima. L’etichettatura di a marca incu una fiura o un ritrattu, abbastanu ad identificà u produttu é ad ammentà a Corsica é so specificità.
Sola, a latteria «Fromagère Corse» di u gruppu Société Roquefort quella figliale di LACTALIS, chi tratta a quantità di latte a più impurtante in Corsica, adopra sistematicamente e parulle «corsu» o «corsica» per e so tichette, in ogni produttu.
U BROCCIU ghjé u solu produttu lattaghju à benefizià di una AOC (Appellazione d’Origine Cuntrolata).
Tutte e latterie sò membre di u sindicatu di difesa é di prumozione di l’AOC Brocciu é mecanicamente, l’inseme di i pastori chi vendenu u so latte dinù. Ghjé una obligazione per e latterie s’elle si volenu francà d’avè à staccà i latti (obligazione imposta dà u decretu d’appiecazione di l’AOC Brocciu)
Quante à i pastori chi caghjanu, menu di 20% sò impegnati inde a dimarchja.
L’identificazione di u Pastore stessu, pare cuntentà u cunsomadore infurmatu or duncque a maiore parte di Corsi.
In realità a pussibilità d’identificà u produttore in vendita diretta, e so bestie, u so sistema di produzzione é a lucalisazione di u so reghjone, abbasta per cunfirmà a qualità é l’autenticità di i so produtti, tuttu essendu sicuru di pudèla verificà ad ogni mumentu.
A certificazione AOC ùn garantisce duncque più ad ella sola, a qualità di i produtti ne mancu a so autenticità. Permette di prutegesi soladimente quandu elle sò precisate tutte l’oblichi imposti dà a prufessione per a trasformazione.
In Corsica l’assenza d’AOC annantu i produtti i più dumandati (furmagli, salumeria e roba purcina in generale) cunsegue di u solu fattu che per sti dui casi i produtti sò trasformati, per a maiore parte, dà ghjente ch’ùn sò micca pastori, duncque dà ghjente ch’ùn anu nisun interessu ad imponesi obligazioni tecniche supplementarie di trasformazione. Per dipiù pare difficiule, per l’amministrazione di cunvalidà una dimarchja di certificazione, senza a cauzione é a participazione attiva di u settore industriale.
C’hé un esempiu esplicitu à ILOCC (l’Interprofession Laitière Ovine et Caprine de Corse) in 2005: quandu chi pronti à realizà a dimarchja d’appellazione, i raprisantanti di i lattaghji anu decisu d’abandunnà a certificazione AOC à prò d’una IGP (Identità Géografica Prutetta). Quella ùn garantisce che solu u locu di produzzione. Inde i fatti, l’elaburazione di l’oblichi di produzzione imposti dà i pastori, ùn li cunvenia micca.
U discorsu chi vale dopu, a culpabilizà i pastori per a so incapacità ad ottene una certificazione maiò, ùn a per scopu che d’allegerisce l’oblichi di produzzione à prufittu d’una nurmalisazione vulsuta dà u settore industriale di a trasformazione.
In Francia oghje, so numarose l’AOC culpite dà mudificazione di i decreti o puru dà dumande chi piglianu sta strada, imposte dà l’industriali. L’esempiu di a vulintà d’abandunnà a caghjatura à latte crudu (camembert) ghjé abbastanza espusitivu, é ghjé a mette a paru incu e voglie é e pratiche di i nostri lattaghji, per una futura certificazione «furmagliu corsu».
Malgradu quessa i pastori corsi anu sappiutu, sin ad oghje, mantene un equilibriu territuriale é un nivellu di produzzione paru dapoi 10 anni, anu dinù participatu attivamente à a difusione di a maghjina cume di a fama di so furmagli, quì é in altrò.
U capatoghju
Quì, a pulitica agricula di a Culletività Territuriale di Corsica ùn a micca permessu à l’attività pastureccia di sviluppàssi nu u so filu produttivu. Però a fortamente cuntribuitu à cresce e capacità di trasformazione, i casgili industriali é tutte e strutture di trasformazione artigianale di latte.
Ghjé forse issu meccanisimu chi a sciambulatu a prufessione é creatu una dualità economica periculosa per l’avvene. Pare una scumpitatura u fattu d’oppone pastori é lattaghji chi sarianu cundannati à cullaburà.
Fin’à 2002 i nivelli d’intervenzione di l’aiuti publichi per a modernisazione di’ssi casgili industriali, tuccavanu 80%. Issi nivelli eranu simili à quelli prestati à i pastori per u sviluppu di a so attività.
Mà quandu chi i pastori eranu ubligati a ghjustificà di e so capacità à produce (cumpetenze, bande, fundariu, materiale, nivellu di furmazione...), mai nunda ùn hé statu impostu à i lattaghji, ne mancu a quantità ne l’origine di u latte ch’elli avianu dà caghjà.
Isse strutture di trasformazione é casgili industriali sò duncque stati vulintariamente sviluppati aldilà di u nivellu oghjincu di produzzione di latte in Corsica. Tutti issi finanziamenti publichi sò dati da l’ODARC. Pare logica, chi oghje l’imprese voglianu rentabilizà à u più i so arnesi industriali é e so pussibilità di sviluppu.
Si sò date una media di progressione economica ubligata di 3% à l’ annu per e so ricette tutale.
Un manca micca u latte à e latterie corse! Ne volenu di più per e raggione spiegate sopra é ghjé per ciò ch’elle u facenu entre.
Fin’à 2007, l’importazione di latte é di furmagli eranu poche (qualchi millaia di litri), rarissime é piatte, perchè eranu ricusate é dinnunziate dà a prufessione (esempiu ILOCC contra a latteria «OTTAVI» in 2004 é prufessione contra e latterie «A FILETTA» é «PIERUCCI» in fine di 2006)
Dapoi l’entre di u 2008, i lattaghji anu scunvitu a magiorità di i raprisantanti di i pastori à l’ILOCC, di purtali un sustegnu prufessiunale utule, puntellatu nantu à argumenti errati é infidi. In più di a progressione economica indispensevule, aghjunghjenu u bisognu di furniscesi quandu u latte veneria à mancà, causa di gattive annate o di prublemi sanitarii.
Isse ragione, ci vole à dilla sò irrespettuose é sgradevule per i pastori produttori di latte.
I Pastori, di pettu à sicchie di più in più longhe oppuru quande elli scontranu crise sanitarie vedenu i so costi di produzzione cresce assai, invece chi i so nivelli di produzzione elli, calanu.
«Spende assai di più per produce di menu» ghjé in corte parulle ciò ch’accade à i pastori di pettu à i capricci di mama natura.
I Lattaghji elli, si francanu di u capatoghju circhendu una surgente di latte chi cola sempre é a pocu prezzu in altrò! Ci empienu e so cisterne segondu i bisogni é i marcati acquistati.
U prezzu di u latte, l’averete capita, un dipende micca di u so costu di produzzione.
Hé bramatu u sustegnu di a prufessione per l’importazione di latte, in contruscambiu l’Interprufessione avaria un sguardu di cuntrolu nantu à l’importazione, senza mai pudène assicuràne, ne a maestria ne mancu a gestione. Questa situzione hé stata palisata quandu chi i pastori truvavanu interresante é a prò di e so attese, e misure di u pianu di rilancia di a filiera. Era tandu chi ci vulia à battesi per impone una vera pulitica di sviluppu pasturecciu à l’ODARC.
Tandu u presidente di l’ILOCC (J-D Musso) di ferraghju 2008, traditu dà certi raprisantanti, prisenta a so demmissione, accumpagnatu di un terzu di i respunsevuli di i pastori é di l’amministradori. I pastori raprisantanti di a «fromagère corse» (LACTALIS) venenu magioritarii inde u cullegiu di i pastori chi vendenu u latte é s’impatruniscenu a presidenza di a struttura.
Issu sbilanciamentu inde a raprisantatività à l’ILOCC, a purtatu i lattaghji cullegati à i nuvelli raprisantanti di i pastori, à piglià u pudere decisiunale.
I pastori chi caghjanu si truvonu scantati di e discussione é pigliati di mira dà i lattaghji. Diventonu concurenti diretti nantu a u mercatu isulanu (oghje quasi 50% di u mercatu), é dinù veri aversarii per a garanzia é l’autenticità di u furmagliu, chi quill’altri ùn ammaestranu micca.
Dapoi ‘ssi scambiamenti à l’ILOCC di ferraghju 2008, é senza che nisun quadru sia statu messu in ballu per l’importazione di u latte, u sustegnu di a prufessione incù i so nuvelli raprisantanti avarà bastatu per apre e porte à l’importazione.
A a Fine di ghjunghju 2008 l’ importazioni di latte in Corsica francavanu u millione di litri! (Sia a produzzione anninca media di circa 40 pastori in Cosica)
Simu luntanu di a sola é simplice «importazione tecnica» ch’elli prupunianu i lattaghji di lugliu 2007, raggione prumossa dinù dà giurnali, liati à ‘ssi lattaghji incù cuntratti publicitarii indispensevuli à u so campà. Oghje si prisenta una vera guerra economica liberale induve chi i prezzi di u latte importatu sò inferiori di 25% à quelli produtti quì! In Sardegna cume in Aveyron u latte vendutu per i mercati al di fora, hé pagatu circa 0.65€ u litru contra 1.20€ in Corsica!
A tutalità di u latte importatu dapoi ferraghju 2008 hé statu caghjatu é vendutu in quantu che casgiu corsu é ciò, senza alcunu cennu per distinguelu o per averte u cunsommatore!
I risichi
I risichi di l’importazione ponu tuccà à tutti l’attori di a filiera.
Di prima à i lattaghji é u so avvene.
Caghjà incu latte d’importazione vole dì ubligatoriamente caghjà a latte scaldatu (pasteurisazione). A pasteurisazione ghje u primu passu di a nurmalisazione d’un furmagliu, issu prucedimentu di caghjatura tomba ogni specificità gustativa di u produttu.
Per di più u latte d’importazione hé un latte produttu incù tecniche d’allevu, razze d’animali é sistemi di produzzione intensificati veradimente sfarenti di i nostri.
Un hé latte produttu à u pasculu cume u latte di e nostre bestie. Ghje un latte sfarente chi ogni spezialistu spiega incu aghjevulezza. I furmagli fatti d’issu latte ùn sprimaranu più e specificità corse.
A pulitica di cumprà latte à a surgente industriale segondu i bisogni, e stagione é l’acquistu di i marcati novi pò vene prestu cume un gattivu mendu per i lattaghji corsi. Si farà, di sicuru, à discapitu di u sviluppu reale di l’attività pastureccia é di u so sboccu. Prestu smarisceranu i pastori à l’orici di lattarie rilucente.
Senza scurdàssi di u fattu, chi a dà cresce di più in più a dipendenza sia per a furnitura quantu che per margine economica.
I cunsumadori sò elli burlati nantu à l’origine di l’ammanugliu mà dinù dà a maghjina di a Corsica. A publicità fatta nantu e tichette burla u cunsumadore quante à l’origine di u produttu. So schersi i cuntroli é puchissime e prucedure ghjudiziare chi culpiscenu iss’ arrubeccii.
Un si parla di u prezzu chi ùn currisponde più à a realità di u mercatu (costi di produzzione) mà à una crescita nascosta di e margine benefiziarie di i lattaghji.
I pastori chi producenu u latte, saranu ancu elli culpiti se u casgiu corsu perde di a so autenticità é duncque di a so rinnomina, ciò chi accaderà, indiati ch’elli sò nantu à una standardiszione di u produttu.
A concurenza à prezzu vile di u latte d’importazione risicheghja d’almannaccà prestu, una riflessione nantu à a pussibilità di riduce i costi di produzzione. I purterà sicuramente à vulè cresce e greghje cume à cambià di sistema di produzzione. A produzzione di latte à u pasculu sarà prestu barratata per sistemi pù intensivi. E piccule bande pecurine é caprune anu dà sparisce à prò di strutture assai più grosse é tutte lucalizate in piaghja.
L’importazione cunducerà forse à un disinteressu economicu per l’avvene di i pastori.
E soluzione pruspettate
L’ importazione ammaestrata ghjé a soluzione scelta dà l’Interprufessione oghje.
Eppuru, cume l’avemu vistu sopra, quasi sei mesi dopu à u disordine di l’ILOCC alcuna decisione ùn hé stata pigliata!
Ci pare pocu pussibile chi l’ILOCC posca avè avàle, ùn sia che un minimu di maestria induve u dirittu privatu face legge. I lattaghji ùn anu micca interessu à gestisce di manera cullettiva l’importazione di latte. Prima, ùn si furniscenu micca tutti à listessu locu, poi ponu avè in più, interessi privati é persunnali incù l’industriali Francesi o Sardi chi li vendenu a materia. Eppoi per finisce lottanu per i mercati al di fora ch’elli si piattanu unu incù l’altri in quante che concurenti.
Bisogna ad ammentà chi u cullegiu di i lattaghji a sempre tricatu à risponde à l’ublichi di publicazione di i cifri precisi é necessarii à a custituzione di l’oservatoriu regiunale. Accettà a chjarezza tutale é subitania nantu à e quantità di latte impurtate é i so prezzi di compra pare un’ illusione , d’altronde ùn l’anu mai prumessa!
A mezu à un mercatu liberale di dirittu privatu, ghjé impussibile per l’interprufessione cume per qualuncque altra struttura prufessiunale ò istituziunale di pratende pudè gestisce ed ammaestrà queste e faccende.
Certificà i produtti fendu a sfarenza trà quelli fabricati incu latte d’importazione é l’altri ghjé a soluzione a più pruspettata é vulsuta dà a maiore parte.
Avemu digià vistu chi a certificazione oghje, ùn hé più una garanzia cummerciale ne infurmativa di pettu à una pulitica di marca ; scelta di l’industriali corsi. Un accerta mancu più di a qualità di u produttu per u consumadore.
I lattaghji sò chjari nantu u suggettu, mai ùn acceteranu di fà a sfarenza di i produtti incu l’etichettatura. Accetterianu una certificazione s’elli ammaestressinu l’elaburazione di l’oblichi di produzzione , chi per u più aghjusteria un antru produttu à e so vendite mà senza ganrantisce l’origine di u latte.
Si po pensà ch’elli sarianu pronti ad accettà una sfarenza legale d’etichettatura, chi cunsistaria a scrive un numaru d’origine auropeanu (N° CEE) incapiscitoghju dà u consumadore o ancu dà un scrittoghju in chjuculellu chi rimpiazzaria «fabricatu in Corsica» dà «custuitu in Corsica». Mà temenu chi una parte di a prufessione é in Corsi in generale si n’avvedessinu.
Omu pò capisce chi a certificazione ùn permettarà micca di piantà l’importazione ne mancu di distingue chjaramente l’origine di u latte caghjatu. L’attesa utule à a messa in opera di una futura dimarchja di certificazione, darà u tempu (parechji anni) à i lattaghji d’arradicà e so pratiche inde a filiera, cume inde a mente di i Corsi é ciò à u pregiudiziu di i produttori di latte corsi, i pastori.
Tutti i raprisantanti di e latterie corse, cacciatu quelli di a «Fromagère Corse», sò corsi di sana arradicati à a so cultura. Sò tutti assai impegnati inde e dimarchje economiche di i so reghjoni.
Iss’omi é isse donne, cume tutti i so operai, cumpresi quelli di a «Fromagère corse», sò sensibuli à e reazzioni di a sucietà corsa cume à a rinnomina di e so imprese.
Devenu esse oghje persuasi, chi i pastori corsi, s’elli sò aiutati cume ellu si deve, sò capace in pocu tempu di produce di più latte or duncque di risponde à u bisognu di i lattaghji. I primi resultati tecnichi di u pianu di rilancia provanu ch’ellu hé pussibile fussi una gattiva annata cume quella scorsa.
Produce di più latte per megliurà u so rivenutu é risponde à a dumanda di e latterie.
Produce di più latte per ch’elli campinu torna assai iss’omi é isse donne d’una attività pasturina produtrice, in ogni pieve di ‘ssu paese.
In fine, produce di più latte di manera à pudè sviluppà u mercatu di i nostri casgii specifichi valorizendu e so autenticità é e so specificità.
I pastori elli, bramanu una pulitica di sviluppu adatta à e so attese, à i so bisogni di muderniasazione, di strutturazione é d’appoghju tecnicu.
Una pulitica di sviluppu vera, cume l’anu pussutu cunnosce d’altri settori agriculi isulani per u passatu.
Una pulitica di sviluppu induve i lattaghji sarianu veri partenarii economichi cume ellu hé statu u casu in Francia in l’annate 70 quandu chi l’industria lattaghja Aveyronnaise circava u latte.
I Corsi ponu dumandà ch’elle piantinu subitu tutte l’importazione di latte.
Elli ponu svultà, l’idee é e pratiche di i lattaghji quande elli piglianu strade periculose per tuttu u settore pasturecciu
I Corsi ponu ricusà l’importazione di latte é saranu, di sicuru intesi é capiti dà i lattaghji é i so operai chi travaglianu é campanu tutti, in terra di Corsica.
I pastori, l’ultimi guardiani di tradizioni seculare, omi di rigiru speranu chi si levarà a cuscienza pupulara chi purtarà a raggione!
VIA CAMPAGNOLA
>> Imprimer ce texte au format .pdf